Prezident İlham Əliyevin fevralın 1-də AzTV-yə verdiyi müsahibəsində səsləndirdiyi fikirlər ağlı kəsən hər kəsi dərindən düşünməyə, nəticələr çıxarmağa sövq edir. Heç şübhəsiz ki, prezidentin açıqlamasının bir sıra istiqamətləri dünya mətbuatının da diqqətini çəkib və xarici KİV-də də biz buna dair manşetlərdən təqdim edilən yazılara rast gələcəyik.
Söhbət ondan gedir ki, Prezident İlham Əliyev bu gün dünyada bəlkə də heç bir rəhbərin cürət edib deyə bilməyəcəyi qlobal məsələləri – ədalətsiz davranışları açıqlayıb və sərt tənqid edib. Təbii, bu, dünyada müəyyən dairələrin xoşuna gəlməyəcək, onlar mümkündür ki, Azərbaycana, Prezident İlham Əliyevə qarşı bir nadan kampaniya da başlatsınlar. Ancaq Azərbaycan Prezidenti qorxmaz bir lider olaraq bunları nəinki diqqətə çatdırıb, vəziyyəti kəskin şəkildə pisləyib.
Söhbət COVİD-19 pandemiyası ilə bağlı peyvəndlərin ədalətsiz bölüşdürülməsi məsələsindən gedir.
Prezident İlham Əliyev müsahibəsində dedi ki, COVİD-ə qarşı peyvənd bütün ölkələrin xalqlarına çatmalıdır. Deməli, 21-ci əsrdə dünyada dəhşətli bir durum var! Azərbaycan rəhbəri insanlıq, əsl liderlik nümunəsi ortaya qoyaraq, bu ədalətsizliyin durdurulmasına çağırış edir. Kasıb, əzilən ölkələrin, xalqların müdafiəsinə qalxır. Azərbaycan Prezidenti açıq tekstlə zəngin ölkələri peyvəndi alıb kasıb ölkələrə də ötürməyə, şirkətləri isə bu sahədə qazanc dalınca qaçmamağa çağırıb.
Beləliklə, Azərbaycan dövləti Qoşulmama Hərəkatının sədri kimi öz bəyanatlarına sadiq qalır, beynəlxalq hüququ və ədaləti müdafiə edir.
Prezident İlham Əliyev xüsusi vurğuladı ki, Azərbaycan beynəlxalq qurumların fəaliyyətində özünü məsuliyyətli ölkə kimi aparır və bundan sonra da öz səsini daim ucaldacaq.
İ.Əliyev pandemiya şəraitində müşahidə olunan ədalətsizlikləri də konkret faktlarla sadalayıb:
Dünya əhalisinin 14 faizini təşkil edən inkişaf etmiş ölkələr bu günə qədər vaksinlərinin 53 faizini sifariş ediblər. “Moderna” vaksininin 98 faizini, “Pfizer” vaksininin 96 faizini də məhz zəngin ölkələr sifariş ediblər!..
Vətən müharibəsi zamanı sırf ermənipərəst mövqe sərgiləyən Kanada isə əsl möhtəkirlik, kəmfürsətlik nümunəsi sərgiləyir: bu ölkə öz əhalisinin sayından dörd dəfə çox – 154 milyon əhali üçün vaksin sifariş edib. Niyə? Məqsəd nədir?
Bu, digər ölkələrdə 120 milyon insana vaksinlərin çatmaması deməkdir. Beləliklə, kasıb ölkələrin insanlarının haqları tapdalanır, onların səhhəti, sağlamlığı risk altına düşür.
Azərbaycan Prezidenti bu davranışın səbəbinə aydınlıq gətirib. Sitat: “Bu yanaşmanın dərin kökləri müstəmləkəçilik dövrünə aparır. Biz neomüstəmləkəçilik, yaxud da ki, elan edilməmiş müstəmləkəçilik dövrünü qeyri-rəsmi müşahidə edirik. Neomüstəmləkəçi ölkələrin başqalarını nədəsə ittiham etməyə mənəvi haqqı yoxdur.
Azərbaycan Qoşulmama Hərəkatının digər üzvlərinə mövcud ədalətsizliklə bağlı məsələni beynəlxalq kürsülərdə, BMT kürsüsündə qaldırmaq çağırışı edib”.
Prezident bu açıqlamanı sözgəlişi verməyib. Bu, bir liderlik missiyasıdır və dünyadakı mövcud ədalətsiz durumun aradan qaldırılması üçün çağırışdır. Əslində, Prezident İlham Əliyevin Azərbaycan Televiziyasına müsahibəsi ilə zəngin ölkələrin ağır fəsadlar verəcək bu praktikadan əl çəkməsi üçün beynəlxalq kampaniyaya start verilmiş oldu.
Olduqca mühüm, fəxr ediləcək məsələdir: Azərbaycan Prezidenti həm liderlik keyfiyyətlərinə, həm şəxsi xarakterinə, həm yüksək insani hisslərə malik bir şəxs kimi təkcə Azərbaycan xalqının problemlərini həll etmir, o, dünyanın narahatedici məsələlərinin həllində rol alır, önə çıxır! Bu, böyük cəsarətdir, qorxmazlıqdır. Əlbəttə, 44 günə Qarabağı alan, 21-ci əsrdə Şuşa fatehi, Qarabağ xilaskarı statusunu qazanan sərkərdə belə də olmalıdır.
Prezidentin bu mövqeyi həm də onun göstəricisidir ki, artıq dünya başqa bir dünyadır, Azərbaycan da bu yeni dəngələri formalaşan dünyanın mühüm bir parçası kimi bütün dünyəvi proseslərdə rol alır… Daha Azərbaycan sözü, səsi eşidilməyən ölkə deyil, indi söz keçən, dinlənilən, hesablaşılan bir dövlətdir. Təbii, İlham Əliyevin uğurlu siyasətinin nəticəsidir bunlar…
Burada bir məqamı da xüsusi vurğulamaq yerinə düşür: Prezident İlham Əliyev müsahibəsində qeyd etdi ki, Azərbaycanın şanlı Qələbəsi bölgə və dünya üçün çox böyük əhəmiyyət daşıyır: “Biz təkcə öz ərazi bütövlüyümüzü bərpa etməmişik, biz erməni faşizmini məhv etmişik, bölgəmizi faşist ideologiyasından tam xilas etməsək də, onun böyük hissəsini məhv etmişik. Erməni faşizmi ən qəddar, ən təhlükəli, ən mənfur, ən çirkin ideologiyadır və biz bu ideologiyanı məhv etdik. İllər keçdikcə erməni xalqı da bizə minnətdar olacaq ki, onları bu bəladan xilas etmək istədik”…
Bəli, 21-ci əsrdə dünyada bir erməni faşizmi təhdidi vardı, bunu da məhz İlham Əliyev və onun Müzəffər Ordusu gorbagor etdi.
Pafossuz-filansız, digər addımlarla, işlərlə yanaşı, Qarabağın azadlığı, bölgənin təhlükəsizliyinin təmini, ədalətli dünya tələbi və erməni faşizminin sıradan çıxarılması fonunda İlham Əliyev 21-ci əsrin əvvəlində və bütövlükdə tarixdə böyük izlər qoyan işlər görür, davranış sərgiləyir.
Atdığı addımlarını, yanaşmalarını, tərzini izlədikcə hər kəs fərqinə varır ki, o, unikal düşüncəli, qorxmaz, kimsədən çəkinməyən, xalqından birmənalı dəstək alan, dünyada ədalət, sülh, barış, xalqının, Yer üzündə bütün insanların xoşbəxtliyini istəyən və buna var gücü ilə çalışan, nümunə kimi göstərilən bir liderdir.
***
İlham Əliyev bir fərqli lider kimi, onun ətrafında yumruqtək birləşən xalqı ilə sanki dərdləşdi də AzTV-yə müsahibəsində. Onun səbrini tükədən məmurların olduğunu dedi açıqca. Kimliklərini də söylədi. Bildirdi ki, yenicə azad olmuş Şuşaya “hücum” çəkib, oranı da qamarlamaq, torpaqları zəbt etmək istəyən yüksək ranqlı məmurları yerində oturdub, onlara elə söz deyib ki, ömrü boyu unutmayacaqlar…
Çox dəhşətli bir mənzərədir. Nə qədər cılız adam olasan ki, liderindən nümunə götürmək, nəfsinə hakim kəsilmək, xalqın, dövlətin inkişafı prosesinə qoşulmaq, prezidentə dəstək olmaq əvəzinə, tam yenilənən Azərbaycan reallıqlarında da qəbilə, feodal, mədə təfəkkürünün ardınca sürünməkdə davam edəsən… Dünya dəyişir, Azərbaycan dəyişir, yeni idaərçilik mexanizmi qurulur, amma məmur bunu fərq edə bilmir və ya qəbullanmaq istəmir…
Prezident İlham Əliyev ilk gündən bildirir ki, işğaldan azad olunan bütün torpaqlar minalardan təmizlənəcək, planlı şəkildə bərpa ediləcək. Orada insanlar üçün yaradılan şərait dünyaya nümunə olacaq. Qarabağ “ağıllı şəhər” konsepsiyası, “ağıllı kənd” konsepsiyası əsasında bərpa ediləcək, keçmiş köçkünlərin azad olunmuş torpaqlara qayıtması təmin olunacaq.
Bu cür ürəklə, incəliklə, dərin analizlərlə, mərdliklə Azərbaycanı bütövləşdirən və Qarabağda cənnətməkan yaratmaq istəyən, habelə yalnızca öz ölkəsinin deyil, dünyanın da qeydinə qalan, ədalətin bərpasına çalışan, böyük ürəkli Şuşa fatehinə xidmət rəisi, nazir isə zəng edib deyir ki, bəs, mənə icazə verin, gedim Şuşada filial açım. Prezidentin dili ilə desək, barı onların ağlı çatıb bunun üçün öncə ölkə rəhbərindən icazə istəməyə. Mərkəzi Bankın rəhbəri hətta ehtiyac belə duymayıb prezidentlə məsləhətləşməyə, eləcə mediaya açıqlama vermişdi ki, filial açacam Şuşada… “Afərin”. Prezident də təbii ki, bilir onların məqsədinin ərazisi cəmi 300 hektar olan, Azərbaycanın mədəniyyət paytaxtı elan etdiyi Şuşanı sadəcə qamarlamaq olduğunu. Necə ki, bu məmurlar uzun illər ərazində Abşeronu, Xəzəri, Qubanı, Xızını, Şamaxını, İsmayıllını, Hacıqabulu… bütün ölkəni qarış-qarış zəbt ediblər, indi də eyni naqis işi işğaldan qurtulan Qarabağda həyata keçirmək istəyirlər.
Bağışlayarmı sizi Ali Baş Komandan?
8 noyabrda “Əziz Şuşa, sən azadsan” deyərkən gözləri dolan, səsi titrəyən Ali Baş Komandanın rəhbərliyi altında yüzlərlə hərbçinin qanı ilə alınan Şuşanı zəbt etmək istəyən məmurların hissləri, düşüncəsi o qədər cılız, zəifdir ki, Qarabağa, Şuşaya da tikanlı məftillər çəkməyi, müqəddəs torpaqları qamarlamağı ağlına gətirir?! Təəssüf! Acınacaqlı haldır ki, bütün dünyanın heyran qaldığı Azərbaycan liderindən məmurlar nümunə götürə bilmirlər…
Təbii, bunlar nəticəsiz qalmayacaq. Prezident anons etdi axı: “Ucuz populyarlıq dalınca qaçanların axırı pis olur. Heç kim özbaşınalıq edə bilməz. Məmurlar dövlət qulluqçusunun etik davranış normalarına əməl etməli, öz yerlərini bilməli, öz işləri ilə məşğul olmalıdırlar.
Qarabağın azad olunması ilə dövlət idarəçiliyinə də yeni yanaşma, yeni model gəldiyini hər kəs hiss etməlidir… Azərbaycan vətəndaşlarını yersiz qıcıqlandıran, onların dövlət aparatına etimadını azaldan heç bir hərəkət cavabsız, cəzasız qalmayacaq”.
Qəribədir, bu adamların milyonları, onlarla mal-mülkü, biznesi var. Hətta nəticələrinə çatacaq qədər. İnsan ömrü də 70-80 ildir. Onların isə 55-65 yaşları var. Hələ də doymaq bilmirlər.
Belə nəticə hasil olur ki, gözü doymayan adamdan nə desən gözləmək olar. Bununla Prezidentə də özlərini yaxşıca tanıtmış oldular…
Prezident buna bir növ işarə də etdi. Bildirdi ki, görüləcək işlərdə mütləq ictimai nəzarət olmalıdır. İctimai nəzarət olmasa, yenə də eybəcər binalar tikiləcək, torpaqlar zəbt ediləcək, hərə özü üçün bir obyekt tikəcək.
Bəli, bu o deməkdir ki, daha prezident məmurlara yox, məhz vətəndaşlara inanır, onları ictimai nəzarətdə fəal olmağa səsləyir. Bu, bütün ölkə boyunca belə olmalıdır.
Bu dövlət – bütövləşən Azərbaycan hamımızındır, vətəndaşın nəzəri, diqqəti məmurun üzərində nə qədər çox olarsa, dövlət də o qədər güclü olar.
Daha məmurlar arxayın olmasın ki, vətəndaş, media onun qanunsuzluğunu çatdıranda məhkəmə, güc strukturları ilə birləşib onu susduracaqlar, cəzalandıra biləcəklər. O dövrlər getdi. Əksinə, yenə buna cəhd etsələr, daha pis cəzalanacaqlar. Prezident özü də müsahibəsində deyib: “Qarabağın azad olunması ilə dövlət idarəçiliyinə də yeni yanaşma, yeni model gəldiyini hər kəs hiss etməlidir. Məmurlar həmişə Prezidentin “Məmur xalqın xidmətçisidir, vətəndaşa xidmət, kömək göstərməlidir, yekəxanalıq etməməlidir. Hansısa qanunsuz tələb irəli sürməməlidir” devizini öz fəaliyyətlərində əsas götürməlidirlər”.
Elşad MƏMMƏDLİ
“Yeni Müsavat”
