“Son günlər Qazaxıstanda baş verənlər fonunda sosial şəbəkələrin Azərbaycan seqmentində də iğtişaşçılar fəallaşıblar. Qazaxıstanda baş verən ssenarinin Azərbaycanda da baş verməsi ilə bağlı müzakirələr keçirilər və s. Belə qüvvələrin niyyəti Azərbaycanı xaosa daşımaqdır. Bu səbəbdən, Azərbaycanda dövlət çevrilişinin baş verməsi üçün müxtəlif versiyalar üzərində baş sındırırlar. Qazaxıstadakı hadisələrin ölkəmizdə də da baş verməsini istəyirlər. Ona görə də KTMT-nin hərbi kontingentinin Qazaxıstana yola düşməsi xəbərini kədərlə qarşılayıblar. Nəzərə almaq lazımdır ki, bu, inqilab niyyətinin reallaşma əmsalını sıfıra yaxınlaşdırır. Azərbaycanda belə iğtişaşlar baş verə bilməz, çünki xalq-hakimiyət birliyi hökm sürür. Xalq Prezidentin ətrafında nəinki birləşib, Prezident İlham Əliyevi öz qəhrəmanı hesab edir”.
RealMedia.az xəbər verir ki, bunu Pravda.az-a açıqlamasında Milli Məclisin deputatı Elman Nəsirov Qazaxıstanda baş verən hadisələri şərh edərkən deyib.
Deputat bildirib ki, Qazaxıstanda baş verən hadisələrin ilkin dövrdə məhz sosial səbəblərə bağlı olduğuna dair müzakirələr geniş yayılmışdı: “Qazın qiymətinin 12 sentdən 27 sentə qaldırılması əhalinin ciddi etirazına səbəb olmuşdu. Burada söhbət 2.1 dəfə artımdan gedir. Ona görə də əhali küçələrə çıxdı, indikindən daha dar çərçivədə etirazlara başlandı. Daha sonra isə ölkənin qərbində başlanan etiraz dalğası, demək olar ki, bütün ərazilərə yayıldı, Almatıda toqquşmalar müşahidə edildi. Nəticədə, hər iki tərəfdən – həm hüquq-mühafizə orqanları, həm də etirazçılar tərəfində itkilər var. Hadisələr göstərir ki, etirazın kökündə heç də sosial motivlər dayanmır. Vaxt keçdikcə etirazçıların bir sıra tələblərinin qarşılandığı halda, onlar siyasi tələblər irəli sürməyə başladılar. Etirazçılar hökumətin və parlamentin buraxılması, həmçinin Prezidentin istefası tələbini irəli sürdülər. Yəni, doğrudan da, sosial yönüm siyasi tələblərlə dəyişdirildi. Hesab edirəm ki, reallıqlar fonunda tələbləri yerinə yetirilən iğtişaşçılar məmnun qalmalı idilər, amma əksi baş verdi, yeni tələblər meydana çıxdı. Getdikcə aydın oldu ki, iğtişaşların kökündə müəyyən xarici qüvvələr dayanır”.
E.Nəsirov deyib ki, iğtişaş törədənlərin xaricdə xüsusi təlim görmüş terror dəstələri olduğu və onların Qazaxıstanda siyasi hakimiyyətin devrilməsinə nail olmaq istədikləri ehtimal edilir: “Yəni, onlar elə mübarizə metodlarına görə terrorçu və quldur dəstələridirlər. Bu reallıqlar fonunda Qazaxıstan Prezidenti Tokayevin KTMT-yə müraciəti nəticəsində təşkilatın sülhməramlı qüvvələri Qazaxıstanda sabitliyin və təhlükəsizliyin təmin edilməsi haqqında qərar qəbul edib. Müəyyən beynəlxalq siyasi dairələrin ayrı-ayrı ölkələri hədəfə alıb öz məqsədləri üçün çevriliş etmək, hökuməti ələ almaq üçün bu cür üsullardan istifadə edirlər. Dövlət çevrilişinə cəhdin digər post-sovet məkanlarındakı iğtişaşlardan fərqi odur ki, Qazaxıstandakı iğtişaşın lideri yoxdur. Ona görə də onlar elə Tokayevin dediyi kimi, müəyyən hazırlıq görmüş quldur dəstələrini xatırladırlar”.
