“RealMedia.az” xəbər verir ki, Beyləqan rayon İcra Hakimiyyəti ölkədə xüsusi karantin rejiminin tətbiq olunması ilə əlaqədar olaraq ahıl və aztəminatlı ailələrə yardım paylayıb, onlara sosial xidmətlər göstərib.
Tənha yaşayan və yaşı 65-dən yuxarı olan, ahıl şəxslərə evlərində sosial-məişət xidmətləri göstərilməklə, müxtəlif ərzaq məhsulları ilə təmin edilib, ev təsərrüfatı ilə bağlı təmizlik işlərində, əsas tələbat mallarının, dərman vasitələrinin alınmasında, kommunal ödənişlərin edilməsində və s. köməkliklər göstəriblər.
Beyləqan rayon icra hakimiyyətindən RealMedia.az-a bildiriblər ki, hazırda rayonda tənha yaşayan və yaşı 65-dən yuxarı, 55 nəfər sakinə gündəlik olaraq evlərində sosial xidmətlər aparılır. Gün ərzində 130 ailəyə – yaşı 65 yaşdan yuxarı tənha yaşayan 55 nəfər sakinə, 4 şəhid ailəsinə, 71 aztəminatlı ailəyə evlərində baş çəkilmiş və müxtəlif ərzaq məhsulları ilə təmin ediliblər.
İcra hakimiyyətindən bildiriblər ki, Nazirlər Kabineti yanında Operativ Qərargah tərəfindən martın 24-dən aprelin 20-dək ölkədə xüsusi karantin rejimi tətbiq edildiyindən, bu tədbirlər çərçivəsində yaşı 65-dən yuxarı şəxslərin evdən çıxması qadağan edildiyindən Beyləqan rayon icra hakimiyyəti bu qəbildən olan sakinlərə yardımlar edib, sosial xidmət göstərməyi davam etdirəcəklər.
